Month: January 2016

Mason’s Bike Inn verskaf nou veilige fietsparkering in die middedorp

Uiteindelik het daar gemoedsrus gekom vir fietsryers wat bang is hulle ysterperde word in die middedorp gesteel.
Juan Mason, eienaar van Mason’s Bike Inn in Beyerstraat, sê lank reeds: “Dit help nie julle bou fietspaaie as die mense nie hul fietse veilig kan toesluit nie.”
En nou het hy self met ‘n plan vorendag gekom: Hy gaan ‘n deel van sy perseel beskikbaar stel vir fietsparkering teen R10 per dag, op weeksdae van 0830 tot 1730.
“Fietsdiefstalle in die Stellenbosch, maar veral in die middedorp, het baie erg toegeneem die afgelope tyd, sodat mense nie met hul fietse dorp toe wil ry nie, en ons wil juis hê meer mense moet fietsry dorp toe”, volgens raadsheer Dawid Botha.
Met hierdie nuwe plan kan mense nou met gemoedsrus werk toe ry of kom inkopies doen in die middedorp en selfs ‘n paar ure gaan fliek sonder die vrees om terug te kom na ‘n halfgesteelde fiets of ‘n leë paal waar hul fiets vasgesluit was, sê Botha.
Die nuwe inisiatief van Juan Mason, wat ook ‘n duidelike kenteken vir sy fietsparkeerplek laat ontwerp het,  word heelhartig gesteun deur Stellenbosch Fietsry, die maatskappy sonder winsbejag wat fietsry in die hele munisipale gebied bevorder en ontwikkel.

Fietsportret:  Andrew Moses (tuinier, 55)

 

  1. Hoe lank ry jy al met jou fiets werk toe?

Ek ry al 18 jaar lank fiets werk toe, winter en somer, eintlik orals, nie net werk toe nie. Ek is nog nooit omgery en het nog nooit geval nie.

  1. Hoe het dit jou lewe verander?

Dis net ‘n plesier om te ry, fiets ry hou my fiks en ek betaal nie petrol of taxigeld nie.  As jy jou fiets oppas, hoef jy omtrent net  jou bande te vervang van tyd tot tyd.

  1. Waarheen is jy oppad en hoe ver ry jy elke dag?

Ek ry van Garden City in Idasvallei na Academia by die Universiteit waar ek werk, so 16 km heen en weer per dag.

  1. Vertel ons meer van jou fiets

Dis ‘n gewone bergfiets, hou homself in stand.

  1. Het jy raad vir mede-fietsryers wat werk toe ry?

Ry eerder fiets as taxi, want jy het geen verkeersprobleme nie. Ry stiller paaie waar daar minder motors is. Moet nie jaag nie, ry rustig

  1. Watter infrastruktuur-veranderinge sal jy graag wil sien in Stellenbosch? Hoe kan ons ons dorp meer fietsry-vriendelik maak?

Daar is te veel motors in die dorp. Wat my opval, is dat die oorsese studente  lief is vir fiets ry en Stellenbossers kan leer by hulle. Taxis wat voor fietsryers injaag en nie wag by kruisings nie, pla my. Fietsbane moet duideliker gemerk word.