- Hoe lank ry jy al met jou fiets werk of winkels toe?
Vandat ek begin werk het , seker nou al 16 jaar. Op dae wat dit reën, verkies ek om eerder met ‘n sambreel te stap.
- Hoe het dit jou lewe verander?
Ek is dankbaar dat ek die vreeslike verkeer van Stellenbosch vryspring. Ek kan net langs die toue en toue motors wat opgehoop stil staan, verby ry. En ek hoef seker nie te noem dat ek nie ‘n parkeerprobleem het nie, dws om eerstens plek te probeer kry en boonop parkeergeld te betaal nie. Fietsry bring mens ook definitief meer in aanraking met die Stellenbosch-omgewing. Jy sien dinge raak wat jy nie andersins sou as jy in ‘n motor gery het nie: ‘n hawelose wat sy slaaphoekie kouebestand probeer maak of die prag van die natuur op ‘n warm, stil somersdag. Fietsry gee vir my elke dag daardie bietjie oefening wat ek dink ek andersins nie sou gekry het nie!
- Hoe ver ry jy elke dag?
Nie ver nie, so 3 km.
- Vertel ons meer van jou fiets
Dis ‘n tweedehandse Rocky 18-spoed bergfiets. Een van die ou staalraam-soorte. Twee van my vorige fietse is gesteel, toe besluit ek om nie weer baie geld te bestee op ‘n fiets nie totdat ek ‘n slot kry wat langer hou. Die fiets is dus taamlik gehawend met roes en ‘n paar ratte wat nie werk nie, maar ek ry al vyf jaar met hom, en gebruik meestal een rat. Fietse is gemaak om te hou.
- Het jy raad vir mede-fietsryers wat werk toe ry?
Om so veilig as moontlik te ry, hou almal rondom jou dop en voorspel die heeltyd wat die voertuie en voetgangers gaan maak. Moenie aanneem almal sien jou of gaan by die padreëls hou nie! Dui jou aksies ook duidelik aan voordat jy dit uitvoer. Ry stadig genoeg in besige areas om skielik te kan stop as jy moet. Ek het toe wel intussen ‘n fietsslot gekry wat nog nie geknip of oopgebreek is nie: ‘n “U-lock”. Hy is die beste sover. Indien jy nie hou van in die reën ry nie, hou ‘n weer “app” of webtuiste dop wat vir jou sê watter ure van ‘n dag reën behoort te val. Regdeur die winter kry ‘n mens dae in Stellenbosch wat dit nooit reën nie, selfs al lyk die weer ook hóé dreigend. Fietsry hoef glad nie ingewikkeld of duur te wees nie. Ek laat vervang, baie min, net die remblokkies en bande wanneer nodig en smeer self van tyd tot tyd ‘n bietjie olie aan die bewegende dele.
- Watter infrastruktuur-veranderinge sal jy graag wil sien in Stellenbosch? Hoe kan ons ons dorp meer fietsry-vriendelik maak?
Motoriste en voetgangers moet definitief meer bewus raak van fietsryers. Dit het al ‘n paar keer gebeur dat motoriste reg voor my inry , omdat hulle my nie in hul blinde kol verwag nie, en voetgangers skielik voor my inloop of uit ‘n taxi klim wat in verkeer stilstaan, omdat hulle nie verwag dat ‘n fietsryer langs die stilstaande motors sal verbykom nie. Geparkeerde voertuie se deure swaai ook soms skielik voor jou oop, omdat bestuurders jou nie verwag nie en net die verbygaande motors in aanmerking neem. Meer padtekens versprei deur die dorp wat teen fietsryers waarsku, al word dit net tydelik aangebring, en ‘n duidelike stippellyn aan die kant van veral smal, besige paaie wat dalk nie breër gemaak kan word nie , byvoorbeeld Birdstraat en Dorpstraat, mag dalk bewustheid verhoog. Die feit dat daar al hier en daar ‘n padteken is wat fietsryers toelaat om op die sypaadjie laat te ry, is ‘n goeie idee, maar op ‘n besige sypaadjie soos in Birdstraat waar daar dikwels massas voetgangers loop en ook stilstaan, is dit amper nie moontlik om daarop te ry nie. ‘n Tipe skeidslyn wat die gedeelde sypaadjie verdeel tussen voetgangers en fietsryers, met meegaande padmerke wat ‘n onderskeid maak, sal dalk help. Besighede in die dorp wat oorspoel op sypaadjies, skep ook tans hindernisse vir voetgangers en fietsryers.